LAPU-LAPU CITY, CEBU-Nipasaka na ang City Internal Affairs Service (CIAS) og kasong administratiba batok sa tulo ka mga personahe sa Police Station 4 sa Lapu-Lapu City Police Office nga gipasanginlan nga nanagmal sa 20-anyos nga tinun-an sa Criminology niadtong Oktubre 4 ning tuiga.
Diin giingon nga ang 20-anyos nga lalaki gipasanginlan nga mikuha sa pipila ka mga gamit sa panimalay nga iyang gibantayan.
Sa ekslusibong pakighinabi sa Bombo Newsteam kang Police Lieutenant Colonel Christian Torres, ang tigpamaba sa LCPO nga ang pamilya sa tinun-an sa criminology maoy nipasaka sa kaso batok sa 3 ka polis niadtong Oktubre 16.
Ang mga akusado mao ang duha ka intel operative ug usa ka imbestigador nga nag-duty sa dihang nahitabo ang giingong pag-atake.
Dugang niini, nagpabilin sila sa Holding and Accounting Unit sa kapolisan samtang nagpadayon ang pagdungog sa kaso nga ilang giatubang.
Sa laing bahin, ang laing tulo ka mga personahe sa Police Station 4 sa LCPO uban sa ilang kanhi hepe, chief clerk ug desk officer nga naka-duty mamahimo nang makabalik sa ilang mga naunang assignment kon ma-clear na sila sa nagpadayong imbestigasyon sa LCPO.
Hinuon, nidugang si Torres nga magdepende pa kung madestino pa ba sila sa Police Station 4.
