14 patay, samtang 10 ang missing human nahulog ang bus sa suba nga adunay sakay nga bag-ong kasal ug pamilya sa Pakistan; Bride, luwas

Patay ang labing menos 14 ka mga bisita sa kasal sa amihanang Pakistan human nga nahulog ang ilang gisakyan nga bus sa suba.

Diin ang bride palang ang gikumpirmar nga luwas sa maong insidente ug padayon nga giatiman sa tambalanan.

Matud ni Wazir Asad Ali, usa ka rescue official sa Gilgit-Baltistan nga adunay 25 ka mga tawo sa bus ug hangtod karon 14 nga mga patay nga lawas pa ang nakuha samtang 10 ang nawala.

Basi sa inisyal nga imbistigasyon nga giingong kusog ang pagpadagan sa drayber sa dihang nawad-an siya og kontrol sa usa ka kurbada.

Ang pamilya sa pamanhonon mibiyahe gikan sa Punjab, kapin sa 500 ka kilometro ang gilay-on, alang sa kasal ug mopauli sa ilang balay sa dihang nahitabo ang aksidente.