Nabalaka ang National Aeronautics and Space Administration (NASA) tungod sa sunud-sunod nga pag-abot sa mga bagyo sa Kasadpang Pasipiko, partikular sa Pilipinas, nga gihulagway sa ahensya nga usa ka ‘talagsaon nga talan-awon’.
Tungod kay matod niya ang Typhoon season mahitabo sa West Pacific sa mga buwan lang sa Mayo ug Oktubre.
Matod sa Japan Meteorological Agency, ang sunodsunod nga pag-abot sa mga bagyo karong Nobiyembre sa Pacific Ocean, partikular na sa Pilipinas, natala nga ‘first time’ sa kasaysayan sukad niadtong 1951, diin natala usab ang sunodsunod nga pag-abot sa mga bagyo sa ‘Pacific basin’.
Kung kahinumdoman nga halos sunodsunod nga nisulod sa landmass sa Pilipinas ang mga nangaging bagyo lakip na ang bagyong ‘Marce’ nga miigo sa nasod niadtong Nobiyembre 7, upat lang ka adlaw dihang nisulod ang bagyong ‘Nika’ nga miguba sa probinsiya sa Aurora.
Niadtong Huwebes sa miaging semana, buwan pa sa Nobyembre, niigo ang bagyong ‘Ofel’ ug liboan ka mga residente ang gipabakwit sa Northern Luzon.
Samtang, ang state weather bureau nitaho sa pag-abot sa laing bagyong ‘Pepito’ nga gipaabot nga moguba sa Bicol, Central Luzon ug Metro Manila, nga posibleng mokusog pa isip super typhoon.
Sa assessment report nga gihimo sa United Nation (UN) humanitarian coordinator sa Pilipinas sa niaging mga buwan, 207,000 ka mga panimalay ang nadaot sa sunodsunod nga mga bagyo nga miagi sa Pilipinas, diin 700,000 ka mga indibidwal ang padayon nga nagpabilin sa mga evacuation center.
