Mipakatap ang Philippine Army (PA) og mga humanitarian assistance ug disaster response (HADR) teams taliwala sa pagkuso-kuso sa Super Typhoon Pepito.
Sa usa ka pahayag, ang tigpamaba sa PA nga si Col. Louie Dema-ala miingon nga ang 9th Infantry Division nagdeploy og 81 ka HADR teams sa Catanduanes, Camarines Sur, Albay, Sorsogon, ug Masbate aron suportahan ang search and rescue operations sa Bicol Region.
Sa laing bahin, ang 7th Infantry Division nipakatap usab og tulo ka teams aron motabang og repack sa mga relief goods sa Global Aseana Park 2, Department of Social Welfare and Development 3 (Central Luzon) warehouse sa San Simon, Pampanga.
Dugang pa ni Dema-ala nga ang 2nd Infantry Division mipakatap usab og mga rescue personnel ug tulo ka KM-450 trucks ngadto sa mga lungsod sa Buenavista ug San Rafael sa Quezon province ug Capalonga, Camarines Norte aron motabang sa mga operasyon sa HADR sa maong mga lugar.
Ingon man nga nag-deploy usab ang 59th Infantry Battalion og duha ka military trucks aron motabang sa mga rescue efforts sa Quezon provincial government.
Samtang, ang mga mayor nga unit sa PA nagbutang og 534 ka search, rescue ug retrieval ug water search and rescue teams nga naka-standby alang sa mga operasyon sa HADR sa mga komunidad nga naigo sa bagyo.
