Gihimug-atan ni House Appropriations panel chair ug Ako Bicol Partylist Rep. Elizaldy Co ang kamahinungdanon sa socio-economic programs ug infrastructure investments nga anaa sa 2025 General Appropriations Bill (GAB).
Matod ni Rep. nga ang nasangpit nga pundo makatabang sa matag Pilipino nga hilabihan nga apektado sa inflation, epekto sa kalamidad ug climate change.
Gitataw ni Co nga ang nasangpit nga pundo maghatag og paglaom sa mga anaa sa mga huyang nga sektor nga nagsalig sa tabang gikan sa gobyerno.
Sa pagsugod sa Bicameral conference tali sa Kamara ug Senado, si Co nanghinaut nga magkasinabot sila aron maseguro nga ang ilang tumong subay sa mga programa ug prayoridad sa kasamtangang administrasyon.
Gitumbok usab ni Co nga ang 2025 national budget mao ang dugo sa atong nasud sa paghatod sa mga importanteng serbisyo ngadto sa katawhan.
Gipresentar usab ni Rep. Co ang mga kausaban sa estado sa nasud sa miaging tuig ug gisiguro niini nga magpadayon kini ubos sa 8-point socio-economic agenda sa administrasyong Marcos.
Partikular nga gitumong niini ang pag-ubos sa poverty incidence nga miigo sa 15.5 porsyento gikan sa 18.1 porsyento sa 2021.
Nagpasabot kini nga 2.45 milyones ka Pilipino ang nahaw-as sa kakabos.
