CENTRAL VISAYAS-Gikatahong duha ka PCG vessels nga MRRV-4402 BRP Malabrigo ug MRRV-4408 BRP Cape Engano ang nadestino sa Sugbo aron motabang sa pagresponde sa Negros Island Region nunot sa pagbuto sa Bulkang Kanlaon.
Mao kini ang gipaambit ni Ensign Abel Jan Lombo, ang tigpamaba sa Philippine Coast Guard (PCG) District Central Visayas subay sa mando ug pagpahibalo ni PCG Commandant Ronnie Gil Gavan nga andam ang ilang ahensya kung gani gikinahanglan sa Negros Island Region ang ilang tabang, human nibuto ang Kanlaon gahapong adlawa, Disyembre 9, 2024.
Ingon man nga nakig-alayon usab ang ilang buhatan sa Department of Social Welfare and Development (DSWD) 7 aron maseguro nga hapsay ug paspas ang paghatod sa mga hinabang gikan sa Sugbo ngadto sa Negros.
Ingon man nga gipasalig usab ni Department of Social Welfare and Development (DSWD) Secretary Rex Gatchalian nga adunay igong suplay sa mga family food packs (FFPs) alang sa mga naapektuhan sa pag-aburuto sa Mt. Kanlaon sa Isla sa Negros.
Matud ni Gatchalian nga ang ahensya adunay kapin sa 1.4 milyones ka boxes sa FFPs nga gipreposisyon sa Western Visayas, Central Visayas ug uban pang duol nga rehiyon.
Ug kung kahinumdoman nga ang Visayas Disaster Resource Center (VDRC) nga anaa sa Sugbo, ang pasilidad sa DSWD diin gitigom ug giapod-apod ang mga food packs sa pamilya ngadto sa mga komunidad nga biktima sa kalamidad ug emerhensya.
Diin adunay 105,857 ka FFPs ang anaa sa Western Visayas samtang 84,537 ka Family Food Packs (FFPs) ug 27,789 ka non-food items (NFIs) ang napundo sa nagkalain-laing bodega sa Central Visayas.
Mipasalig usab si DSWD 7 Regional Director Shalaine Marie Lucero ngadto kang Canlaon City Mayor Jose Chubasco Cardenas nga suportado sila sa ahensya ug gawas sa mga Food and Non-Food items, lakip niini ang Mobile Command Center./
Subay niini, giawhag usab ni Gatchalian ang kasikbit nga mga komunidad, ilabina kadtong nagpuyo sulod sa six-kilometer radius sa summit sa Mt. Kanlaon, sa pagsunod sa mga emergency evacuation notice sa ilang LGUs.
