SOUTH KOREA-Gisugdan na sa Constitutional Court sa South Korea ang proseso sa pagdesisyon sa impeachment ni Korean President Yoon Suk-yeol, human sa desisyon sa National Assembly nga tangtangon siya sa katungdanan.
Ang impeachment resulta sa iyang kontrobersyal nga pagsuway sa pagdeklarar sa martial law, nga dali usab nga gibakwi human sa unom lang ka oras, apan hinungdan sa kaylap nga kagubot, pagpahunong sa diplomatikong mga kalihokan, ug kagubot sa mga merkado sa pinansya.
Sa impeachment resolution nga gisang-at ni Jung Chung-rae, Chairman sa Legislative and Judiciary Committee sa National Assembly, ang Constitutional Court adunay 180 ka adlaw sa paghatag og pinal nga desisyon bahin sa impeachment ug kon gani tangtangon si Yoon, usa ka kalit nga eleksyon sa pagkapresidente ang himuon sa sulod sa 60 ka adlaw aron mapili ang mohulip kaniya.
Samtang si Prime Minister Han Duck-soo maoy unang molingkod isip acting president hangtod nga mohimo og desisyon ang korte.
Misaad ang korte nga mohimo og “swift and fair” trial, ug duha ka huwes ang itudlo nga modumala sa pagsusi sa mga ebidensiya.
Pagkahuman sa boto sa impeachment, ang lider sa oposisyon nga si Lee Jae-myung nanawagan alang sa dinaliang aksyon aron makunhuran ang dili pagkakapareho sa politika ug gisugyot ang pagporma sa usa ka nasudnon nga konseho nga magsiguro sa kooperasyon tali sa gobyerno ug sa Nasyonal nga Asembliya.
Bisan pa sa mga panawagan nga i-impeach si Prime Minister Han Duck-soo tungod sa giingong kapakyas niya sa pagpugong sa deklarasyon sa martial law, si Lee niingon nga dili na nila kini ipadayon aron dili na makamugna og dugang panagsumpaki sa politika. Hinuon, gipasalig ni Lee nga ang Partido Demokratiko komitado sa pagpalig-on sa nasudnong mga kalihokan ug pagpasig-uli sa pagsalig sa internasyonal nga mga nasud.
