Girekomendar sa House quad-committee ang pagpasaka og mga reklamong crimes against humanity batok nila ni kanhi Presidente Rodrigo Duterte, Sen. Ronald dela Rosa, Sen. Bong Go, kanhi PNP chiefs Oscar Albayalde ug Debold Sinas, P/Col. Royina Garma, P/Col. Edilberto Leonardo, ug Muking Espino.
Dugang usab nga pasahan og mga reklamo ang mga personalidad nga nalambigit sa POGO-related nga mga aktibidad, lakip na si kanhi presidential spokesperson Atty. Harry Roque, Cassandra Li Ong, Alice Guo, ug ang igsuon ni kanhi presidential adviser Michael Yang nga si Hong Jiang Yiang.
Matud ni Barbers nga ang imbestigasyon nagdala sa kahayag sa usa ka makalilisang nga pag-abuso sa gahum ug institutional impunity sa panahon sa Duterte administration.
Dugang pa niini nga ang mga testimonya sa mga saksi nga gipamatud-an sa ebidensya nagpadayag sa usa ka sistema nga nagdasig sa pagpatay sa gidudahang mga drug personality.
Kahinumudan nga direktang giakusahan ni Garma si Duterte ug ang mga kaalyado sa kanhi Presidente nga ang ‘Davao model of reward system’ kay gustong ipatuman sa tibuok nasud.
Atol sa imbestigasyon niadtong Nobyembre 13, ang kanhi Presidente kay wala mangayo og pasaylo sa iyang polisiya sa drug war ug gani nanghulga sa International Criminal Court (ICC) sa pag-imbestigar kaniya sa mga krimen batok sa katawhan sa labing madali nga panahon.
