LAPU-LAPU CITY,CEBU- Mipasaka og reklamo ang sikat nga abogado nga si Atty. Julius Oliver Moeller batok sa mag-amahang drayber og Public Utility Jeepney (PUJ) kabahin sa road rage incident sa kadalanan M.L. Quezon Highway sa Barangay Mactan sa dakbayan sa Lapu-Lapu niadtong Lunes, Disyembre 16, 2024.
Subay sa panghitabo nga misuway og overtake ang jeep bisan paman sa kahuot sa lakat sa trapiko sa naasoy nga kadalanan diin si Moeller ang giingong gibanhagan sa drayber sa jeep.
Sa pakighinabi sa Bombo Newsteam kang Police Lt. Col Christian Torres, ang tigpamaba sa Lapu-Lapu City Police Office nga gustong mo-overtake ang driver sa jeep.
Apan, gibadlong kini ni Moeller nga dili lang pa-overtakon kay bumper-to-bumper gihapon ang traffic ug kung ugaling man nga mo-counterflow kini, mas mosamot hinuon ang traffic.
Gumikan niini, nakasuko ang drayber sa jeepney.
Samtang, ang anak sa drayber nga nag-operate usab og PUJ ni-blocked ug nibabag sa agianan sa sakyanan ni Moeller.
Dayon, ang amahan miwara-wara ug barbecue stick ug kutsilyo, samtang ang anak nihulga nga patyon ang abogado.
Maayo na lang, si Moeller nagpabilin sa sulod sa iyang sakyanan.
Apan, gibunalan sa anak ang hood sa sakyanan ni Moeller, hinungdan sa kadaot.
Sa dihang nahuman na ang tensiyon, ang reklamante daling mitaho sa hitabo ngadto sa kapolisan.
Ang duha ka suspek mitahan dayon sa mga otoridad.
