MABINAY, NEGROS ORIENTAL- Patay ang duha ug tulo ang naangol human sa aksidente nga nakuryentihan sa Barangay Poblacion, Mabinay, Negros Oriental, gahapon sa hapon Lunes, Enero 6, 2025.
Giila ang mga biktima nga namatay nga sila si Barangay Arebasore Councilor Elnie Endencio ug lift truck operator Juniel Tenebroso, 31-anyos.
Samtang ang naangol mao sila si Jay-ar Norbe, 33-anyos, konsehal usab sa Arebasore; Realyn Billares, 19-anyos, SK Chairwoman sa Barangay Banban; ug Kimjun Padasay, 30-anyos, Barangay Secretary sa Barangay Arebasore.
Matod sa kapulisan, gipaubos sa grupo ang ilang Christmas tree ug gitangtang ang suga niini gamit ang lift truck.
Apan, ang boom sa trak kay naigo sa usa ka live wire, hinungdan sa pagkakuryente.
Nasuta nga ang Christmas tree kabahin sa entry sa Barangay Arebasore sa Lingganay Festival, nga nagpasiugda og contest alang sa labing maayong Christmas tree.
Anaa na sa estable nga kahimtang ang tulo ka mga biktima nga naangol ug giatiman sa Mabinay Medicare Hospital samtang ang duha nga namatay gideklarar nga patay na ni Dr. Ernest T. Uy.
