CEBU CITY-Andam nga muabag sa nagkadaiyang kalihukan sa kapistahan sa Sr Sto Niño de Cebu ang buhatan sa Philippine Red Cross Cebu Chapter sa Sinulog 2025.
Kini ang gipamahayag ni Atty. Maria Vera De Jesus, ang Chapter Administrator sa PH Red Cross Cebu Chapter diin dili lamang sa adlaw sa Sinulog Grand Parade naka-aktibo ang sakop nila apan sa tibuok semanang kalihukan sa kapistahan.
Dugang pa nga mas lapad ang ilang deployment karong tuiga kon itandi sa nakalabayng duha sa Sinulog nga gipahigayon sa Cebu South Road Properties (SRP) tungod kay anaa na sa pusuran sa dakbayan sa Sugbo ang pagbalik sa kalihukan sa Sinulog.
Ingon man nga niadtong pang Enero 9 sa Opening Salvo sa kapistahan naka-istasyon ang mga sakop sa PH Red Cross nga dili lamang gilangkoban sa Cebu Chapter apan apil na sab ang Lapu-Lapu City ug Cordova Chapter.
Giandam sa PH Red Cross ang 6 ka ambulances nga ipakatap sa tibuok routa sa Grand Parade og magtukod sab kini sa Emergency Medical Unit Type 1 nga manghud lang og usa ka ospital diin kumpleto sa mga gamit nga makatambal sa mga minor injuries nga adunay presensya sa mga doctor ug nurses.
Giawhag gihapon sa PH Red Cross ang publiko nga abli gihapon ilang buhatan sa mga indibidwal nga mudonar og dugo ilabi na karong panahona nga gikinahanglan sa mga pasilidad sa tambalanan.
