CEBU CITY-Giisyuhan sa kagamhanang dakbayan sa Sugbo og notice of termination ang SBD Builders kinsa maoy contractor sa Reinforced Deck Girder Bridge sa Sitio Candarong hangtod sa Tanay Road, Barangay Pulangbato sa bukirang bahin sa dakbayan sa Sugbo.
Gipahibalo kini ni Cebu City Mayor Raymond Alvin Garcia kaniadtong Biyernes diin sa pagtunol sa notice kay gilugwayan lang kini og pito (7) ka adlaw ang SBD Builder aron makasumiter og tubag.
Sa higayong dili kini makatubag kay luwatan kini sa final termination sa kontrata sa maong taytayan.
Ingon man nga bisan pa sa termination action, ang contractor mabayaran gihapon sa ilang nasugdan nga trabaho ug kini madeterminar pinaagi sa himoong joint inspection sa kagamhanang dakbayan.
Kahinumduman ang mga opisyales sa Barangay Pulangbato miawhag sa Cebu City Government nga i-terminate ang kontrata sa SBD Builders alang sa pagtrabaho sa taytayan sa ilang barangay tungod sa kalangay nga nakahatag na hinuon ug perwisyo sa mga lungsuranon.
Ang SBD Builders mao usab ang kontraktor sa rubberized track oval sa Cebu City Sports Center, nga nag-atubang usab og pipila ka mga concerns kalabot sa ilang integrity tungod sa pagkalangay sa construction.
