Gipasiguro sa Department of Agriculture nga ang sugyot sa National Price Coordinating Council (NPCC) nga magdeklarar og food emergency kay alang lang sa bugas ug dili sa tanang batakang palaliton sa merkado.
Matud ni DA Assistant Secretary for High Valued Crops, Sagip Saka ug Intellectual Property Deputy Spokesperson Atty. Joycel Panlilio, iyang gipasiguro nga ang food emergency mao ang pag-release og stocks sa mga bodega sa National Food Authority (NFA) ug dili maapektuhan ang pipila ka mga common goods nga mapalit sa merkado.
Dugang niini nga ang NPCC adunay gahum sa pagdeklarar og food security emergency alang sa ubang mga batakang palaliton kung adunay makit-an nga mga iregularidad sama sa ilegal nga pagmaniobra sa presyo o talagsaon nga pagsaka sa ilang mga presyo.
Samtang, padayon nga nagpaabot ang habig sa DA sa resolusyon kalabot sa deklarasyon sa food emergency sa bugas.
Sa higayon nga madawat na kini sa kalihim, tun-an na usab kini, apan sama sa gipahayag ni Agriculture Secretary Francisco Tiu Laurel Jr., posibleng madeklarar kini sa dili pa matapos ang Enero, ilabi na kon tataw pa ang panginahanglan sa deklarasyon niini.
Kasamtangang gipaabot pa ang deklarasyon sa food emergency alang sa bugas, samtang gisugdan sa ahensya ang pagtakda sa maximum suggested retail price (MSRP) sa imported nga bugas, nga anaa sa P58.
