Mideklarar og ceasefire sugod gahapong adlawa ang alyansa sa mga rebeldeng grupo sa Democratic Republic of Congo.
Sa usa ka pahayag, ang grupo, nga naglakip sa mga rebeldeng M23 nga gipaluyohan sa Rwanda, mikutlo sa humanitarian reasons sa pagdeklarar og ceasefire human giilog sa grupo ang teritoryo sa silangang bahin sa nasud.
Sumala sa United Nations, dul-an sa 900 ka mga tawo ang namatay ug 2,880 ang nasamdan sa bag-ohay nga panagsangka duol sa Goma, ang kinadak-ang siyudad sa silangang bahin sa DR Congo, human kini gilikosan sa mga rebelde.
Susamang gikondenar usab sa Group of 7 (G7) ug sa European Union ang opensiba isip usa ka dayag nga paglapas sa soberanya sa Congo.
Subay niini, nanawagan si DR Congo communications minister Patrick Muyaya sa international community nga ipahamtang ang mga silot sa Rwanda aron mahunong kini tungod kay dili angayan ug madawat ang gihimo sa rebeldeng grupo kung ang kalinaw sa Africa ug rehiyon mapreserbar.
