Nanghinaot ang Department of Justice (DOJ) nga isipon ni Bise Presidente Sara Duterte ang mga reklamong kriminal nga gisang-at batok kaniya isip kahigayonan nga malimpyohan ang iyang pangalan.
Ang tigpamaba sa hustisya nga si Mico Clavano mihimo sa maong pamahayag human ang National Bureau of Investigation (NBI) opisyal nga nisang-at og rekomendasyon sa DOJ niadtong Miyerkules alang sa incitement to sedition ug grave threat nga mga reklamo batok sa Bise Presidente.
Matud usab ni ASec. Clavano nga nanghinaot sila nga motambong ang Bise Presidente sa preliminary investigation kon siya ipatawag. Matod niya nga transparent kini nga proseso mao nga nag-amping sab sila kay kontra kini sa usa sa labing taas nga opisyal sa atong nasud.
Busa, gikabutyag sab niya nga adunay katungod ang Bise Presidente nga mosumiter sa iyang counter-affidavit isip iyang depensa ug gamiton kini nga kahigayonan sa paglimpyo sa iyang pangalan.
Giklaro ni ASec.Clavano nga ang mga reklamo nga gisang-at sa NBI batok kang VP Sara nagpaabot pa sa National Prosecution Service (NPS) aron pagtuki ug pagtino kon duna bay “reasonable certainty of conviction.”
Kini nagpasabot nga ang maong mga reklamo mahimong ibalik ngadto sa NBI alang sa dugang case build-up o ipadayon sa preliminary investigation nga moresulta sa pagpasaka og kaso ngadto sa korte.
Gipaabot nga molanat lang og pipila ka adlaw ang National Prosecution Service sa pag-imbestigar sa mga reklamo.
Kahinumdoman nga ang mga reklamo batok kang VP Sara nagsugod human niya gibutyag sa online press conference sa miaging tuig nga siya maoy gitahasan sa pagpatay kang Pres. Ferdinand Marcos Jr., First Lady Liza Araneta-Marcos ug House Speaker Martin Romualdez kon ugaling patyon siya.
