Anaa sa usa ka mission ang Olympic gold medalist nga si Hidilyn Diaz sa paghimo sa mga batan-ong Pilipino nga mahigugma ug moapil sa mga sports, ilabi na sa weightlifting.
Misuroy si Diaz sa Ilocos Norte aron pagdasig ug pagpalambo sa sunod nga henerasyon sa mga atleta.
Ang labing unang Olympic gold medalist sa nasod bag-o lang nakigtagbo sa mga opisyal sa Departamento sa Edukasyon aron pasiugdahan ang weightlifting nga maapil isip regular nga kalihokan sa Palarong Pambansa, imbes nga usa lang ka demonstration sport.
Matod niya, 10 lang ka rehiyon ug dili tanang school divisions sa Pilipinas ang adunay weightlifting sports.
Determinado nga mohatag og balik sa Filipino community, si Diaz ug miboluntaryo nga moserbisyo isip tournament director alang sa weightlifting events sa higayon nga opisyal na nga giila ang sport isip kabahin sa Palaro.
Nipadayag ang Olympic gold medalist og paglaum nga ang weightlifting mahimong tinubdan sa mga bulawan nga medalya sa nasod sa mga dagkong international events.
Ang iyang pasalig naggikan sa iyang makasaysayanon nga kadaugan sa bulawan nga medalya sa Tokyo Olympics sa 2021, usa ka milestone nga iyang gituohan nga maghatag og dalan alang sa daghang bulawan nga medalya sa umaabot nga internasyonal nga mga kompetisyon.
Ang probinsiya sa Ilocos Norte maoy nag-host karong tuiga sa Palaro sa Mayo ug si Diaz migahin og panahon sa pagbisita sa world-class nga Ferdinand E. Marcos Sports Stadium diin kadaghanan sa mga dula ipahigayon.
