CEBU CITY-Gisurpresa ni Bise Presidente Sara Duterte ang mga Sugbuanon sa iyang pag-abot sa dakbayan sa Sugbo kagahapon, Pebrero 26, 2025.
Diin giubanan sa Bise Presidente sila si Dismissed Cebu City Mayor Michael Rama ug Bise Mayor Donaldo “Dondon’ Hontiveros ug iyang grupo sa politika nga misuroy sa mga kabalayan sa Barangay Ermita, Brgy. Duljo Fatima lakip na sa Carbon Public Market, diin nagsugod ang ilang tapok alas 5:30 sa buntag.
Gipakita sa mga Sugbuanon ang ilang walay puas nga suporta kang VP Sara Duterte human maghuot ang upat ka barangay nga iyang gibisita ug halos dili na maagian tungod sa presensya sa opisyal.
Gipaambit usab ni Sara Duterte nga ang iyang pagbisita sa dakbayan maoy personal nga pagpasalamat sa mga Sugbuanon nga nisalmot sa People’s Indignation Rally niadtong Pebrero 22, sa Mandaue City.
Diin, matod niya, ang mga tawo adunay katungod sa pagpahayag sa ilang kasuko, ug adunay panalipod sa konstitusyon alang sa freedom of speech ug freedom of expression.
Dugang pa niya nga angayan lang nga masayod ang mga opisyal sa gobyerno sa gibati sa katawhan.
Mipasabot usab kini kabahin sa wala pagtunga sa Rally nga gipahigayon sa Cebu ug matud ni Sara nga wala nagtugma sa iyang schedule apan, nanghinaot kini nga sa sunod kay makatambong na kini.
Samtang, sa dihang gipangutana kini bahin sa petisyon nga gisang-at batok sa iyang impeachment case, ang bise presidente miingon nga iya ng gitugyan ang maong matang sa iyang mga abogado sa pagdumala sa maong kaso.
Gawas sa pagpasalamat sa mainitong pag-abi-abi sa mga Sugbuanon kaniya, nanawagan usab siya nga maghiusa ang tanan paaingon sa pagkab-ot sa tinuod nga kalambuan alang sa nasud.
