PORO, CAMOTES ISLAND-Giablihan sa lungsod sa Poro sa isla sa Camotes sa amihanang Sugbo ang laing “Hapitanan sa Sugbo” niadtong Biyernes Pebrero 28, 2025.
Ang maong groundbreaking ceremony kay nagtimaan sa bag-ong pasilidad sa islang-lungsod diin magsilbi kining welcoming space para sa mga turista nga mubisita sa mga kasuyuranan sa Camotes.
Gipangulohan ang maong kalihokan ni Cebu Provincial Governor Gwendolyn Garcia uban sila si Poro Municipal Mayor Gary Rama, Board Member Red Duterte, Mike Villamor, Glenn Soco ug uban pa.
Ang maong pasilidad kay adunay gidak-on sa 171.10 square meters nga nahimutang sa luna nga adunay gilapdon sa 9,088.40 square meters.
Masilbi kining modern traveler hub nga makadalit og mga serbisyo sama sa air-conditioned lounge areas, charging stations, tourist information center, mini food court, coffee shop, souvenir shop ug uban pa.
Dugang pa nga ang maong pasilidad kay usa ka solar-powered facility nga gilaumang makapabaskog sa ekonomiya ug tourismo sa maong dapit.
