PROVINCE OF CEBU- Patay ang usa ka senior citizen human gitigbas sa makadaghang higayon sa usa ka lalaki nga silingan niini sa may sapa sa Purok 4, Brgy. Catmondaan, Lungsod sa Catmon, gahapon Lunes Marso 3, 2025.
Sa pakighinabi sa Bombo Newsteam kang Police Captain Renerio Lima Mejias, ang hepe sa Kapulisan sa Catmon Municipal Police Station, gitino niini nga nakaangkon ang biktima og daghang samad tinigbasan sa kalawasan, liog, ug ulo.
Giila niini ang biktima nga si Celso Subang, 60 anyos, usa ka manananggot nga nagpuyo sa nahisgutang lugar.
Samtang ang suspek giila nga si Peter Colis, 40 anyos, laborer ug pulos mga residente sa naasoy nga lugar.
Sa inisyal nga imbestigasyon sa kapulisan, nasayran nga sa dihang paingon na mopauli ang biktima, nagkasugat kini sa suspek, gani nag-kompronta pa ang duha apan matud pa nilitok og pulong nga “Boang” ang biktima ug ni-aksyon siyag hikap sa iyahang sanggot, hinungdan nga napungot ang suspek dayon bunlot sa sundang nga gidala niini og gitigbas sa makadaghang higayon ang biktima.
Nasuta nga aduna nay daan nga panagbangi ang suspek ug biktima sanglit sa higayon nga mahubog ang biktima giingong manawag kini og “Boang” ngadto sa suspek, hinungdan nga sa nakalabay nga tuig una na sila nga gihusay sa barangay.
Sa pagkakaron, nasikop na ang suspek ug gihikay na sa kapulisan ang kaso nga ipasaka sa iyaha nga mao ang homicide.
