Gikonsiderar sa New Mexico Office of the Medical Investigator nga natural cause ang pagkamatay sa Oscar-winning actor nga si Gene Hackman ug ang asawa niini nga si Betsy.
Kahinumduman nga nakit-an ang patayng lawas sa magtiayon niadtong Pebrero 26, sa ilang balay sa Santa Fe, New Mexico, USA ug matod sa mga imbestigador, usa lang ka semana ang gintang sa ilang kamatayon ug misteryo gihapon alang kanila.
Sa usa ka pahayag, si Heather Jarrell, Chief Medical Examiner sa New Mexico Office of the Medical Investigator, mikompirmar nga ang hinungdan sa kamatayon ni Hackman may kalabotan sa hypertensive ug atherosclerotic cardiovascular disease, diin ang Alzheimer’s disease adunay dakong papel.
Samtang, ang hinungdan sa kamatayon ni Betsy Hackman gitino sa mga medical examiner nga hantavirus pulmonary syndrome, usa ka sakit nga gipahinabo sa virus nga dala sa mga ilaga.
Ang magtiayon namatay tungod sa natural nga hinungdan ug walay mga timailhan sa trauma o carbon monoxide poisoning, nga usa sa mga pagduda sa mga awtoridad niadtong panahona.
Diin ang Hantavirus adunay mga simtomas nga sama sa trangkaso, taas nga hilanat, sakit sa kaunuran, ubo, ug mahimong hinungdan sa mas grabe nga mga problema sa pagginhawa.
Gipasabot pa ni Jarrell nga ang hantavirus napasa gikan sa hugaw sa ilaga, diin ang magtiayon giingong nataptan sa virus.
