Giklaro ni Presidente Ferdinand Marcos Jr. nga walay kalapasan nga nahitabo ug legal ang pagdakop ug pag-turnover ngadto sa International Criminal Court (ICC) batok kang kanhi Presidente Rodrigo Duterte.
Matud sa Presidente nga gisunod lang nila ang sakto ug legal nga proseso sa pagsilbi sa warrant, apil na ang pagbasa sa iyang mga katungod.
Gitataw usab sa presidente nga ang Pilipinas nakigtambayayong lamang sa International Criminal Police Organization (Interpol) ug dili sa ICC.
Ingon man nga gihimakak usab niini nga usa ka political stunt ang pagdakop sa kanhi Presidente, sanglit ang kaso nagsugod pa niadtong 2017, sa wala pa si Marcos nahimong presidente.
Dugang niini nga dili mabasol ang mga tawo kung gani ilang ikonektar sa politika ang maong panghitabo apan gibarugan niini nga igo lang sila mituman sa balaod sa gobyerno.
