Gipanghimakak sa Armed Forces of the Philippines (AFP) ang mga taho sa giingong pag-resign sa pipila ka mga sundalo human sa pagkasikop ni kanhi Presidente Rodrigo Duterte.
Matod pa sa tigpamaba sa AFP nga si Col. Francel Margareth Padilla, nga wala pa mapamatud-i ang balita bahin sa giingong pag-resign sa AFP personnel isip pagpakita og suporta sa kanhi Presidente nga gidakop ug gidala sa The Hague, Netherlands niadtong Martes tungod sa giingong krimen batok sa katawhan atol sa kataas sa kampanya sa iyang administrasyon batok sa ilegal nga drugas.
Kalabot niini, giawhag sa opisyal sa AFP ang tanan nga likayan ang pagpakatap sa dili kumpirmadong impormasyon ug pagpraktis sa kritikal nga panghunahuna.
Matud usab ni Col. Padilla nga ang Armed Forces of the Philippines nagpabilin nga usa ka propesyonal, nagkahiusa, ug non-partisan nga institusyon ug komitado sa iyang mandato sa pagpanalipod sa nasud ug pagserbisyo sa katawhang Pilipino.
Dugang pa niya nga ang ilang mga personahe padayon nga nagtutok sa ilang gipanumpaan nga katungdanan, pagsunod sa lagda sa balaod ug chain of command.
Samtang, nasayran nga wala na-monitor si Philippine Air Force Col. Maria Consuelo Castillo, nga kagubot o pag-resign sa bisan kinsang personnel sa ilang han-ay.
