Nagpahigayon og Coordination Meeting ang kagamhanang dakbayan sa Lapu-Lapu sa pagpangandam sa nagsingabot nga Sad-sad Festival.
Ang maong panagtigom niadtong Huwebes, Abril 3, kay gipangulohan ni Lapu-Lapu City Mayor Junard “Ahong” Chan ug ni City Tourism Officer Head Garry Lao sa pagpasiugda og usa ka Technical Working Group (TWG) sa umaabot Sad-sad Festival ug Kadaugan sa Mactan.
Kasayran nga ang Sad-sad Festival kay usa sa mga major highlights sa tinuig nga kasaulogan sa Kadaugan sa Mactan sa dakbayan sa Lapu-Lapu.
Gani sa pagdani og baga nga partisipasyon sa publiko kay gimanduan sa mayor ang pangu sa City Tourism Office sa pagpasaka sa subsidiya sa mga partisipante.
Magdalit og P1-milyon nga cash prize isip ganti ang kagamhanang dakbayan sa Top-Performing Cluster sa maong kapistahan sa inter-barangay competition category niini.
Ang mga kategorya sa mabulokong kapistahan kay mao ang musunod:
Best in Ritual Showdown;
Best in Street Dance;
Best in Reyna Bulakna; ug
Best in Datu Lapu-Lapu
Ang karong edisyon sa Kadaugan sa Mactan kay magtimaan sa ika-504 nga kasumaran sukad sa makasaysayanong kadaugan ni Datu Lapulapu sa kamot sa mga langyaw nilang Ferdinand Magellan.
