Napalgang patay sulod sa iyang panimalay sa Sitio Bakhaw, Barnagay Catmondaan ang usa ka incumbent nga municipal councilor sa lungsod sa Catmon sa amihanang bahin sa lalawigan sa Sugbo adlawa sa Dominggo, Abril 6, 2025.
Ang maong biktima kay giilang si Konsehal George Molina, 51-anyos, nga giilang “Idol” sa mga residente sa maong lungsod tungod sa hilig sa isports niini nga napalgang patay sa kusina sulod sa iyang panimalay sa 3-anyos nga pag-umangkon nga babaye niini.
Human nasaksihan sa bata ang patayng lawas sa iyang konsehal gna uyuan kay daling gidala sa tambalanan sa silingang lungsod sa Sogod ang biktima apan nadeklarar dayon kining dead-on-arrival.
First-time councilor si Molina sa konseho sa maong lungsod diin nanghinaot pa unta kining magpapili pagbalik karong umaabot nga Mayo 12.
Base sa inisyal nga imbestigasyon sa Catmon Municipal Police Station pinaagi ni OIC-Chief Police Captain Renerio Mejias sa eksklusibong pakighinabi sa Bombo Radyo Cebu kay ang hinungdan sa kamatayon sa biktima kay ang pagkutlo niini sa iyang kaugalingong kinabuhi pinaagi sa pagbigti sa pisi hinigot sa liog niini.
Apan padayon pa nilang gisuta ang ubang detalye sa maong panghitabo alang sa posibling motibo niini.
