CEBU CITY- Nag-awit karon ang tanang katawhan nga giluwas ni Kristo og Alleluia tungod kay nabanhaw na ang atong manunubos.
Ang walay sulod nga lubnganan labaw pa pagtuman sa mga saad ni Hesus sa iyang mga tinun-an, usa ka gamhanan nga pagmantala sa kadaugan sa Dios batok sa sala ug kamatayon.
Kini nagpakita usab sa iyang kamatinud-anon sa iyang mga pulong nga ang Dios sa paglaum dili manglimbong ug mopakyas gumikan gituman niini ang iyang mga saad.
Pinaagi sa pagkamasinugtanon ug paghalad sa kaugalingon ni Hesus sa krus, iyang gibali ang pagkadili-masinugtanon sa atong unang mga ginikanan ug giablihan ang mga ganghaan sa Langit alang kanatong tanan.
Ning Pasko sa Pagkabanhaw, atong tugotan ang nabanhaw nga Kristo sa pag-abli sa mga pultahan sa atong mga kasingkasing ug paggisi sa tabil sa kangitngit, aron kita makalakaw sa kahayag sa grasya ug makapuyo sa bag-ong kinabuhi nga iyang nadaog alang kanato.
Mao kini ang sulod sa mensahe ni Cebu Archbishop Jose S. Palma alang sa Pasko sa Pagkabanhaw diin bag-ohon sa paglaum ug kalipay nga dala sa Pagkabanhaw ang matag usa kanato.
Ingon man nga nanghinaut kini nga ang nabanhaw nga Ginoo mopanaw uban kanato isip usa ka Simbahan, usa ka Katawhan sa Dios, ug gitubos sa gugma.
