CEBU CITY- Patay ang usa ka polis human kini maaksidente sa Gorordo Ave, Brgy., Kamputhaw, dakbayan sa Sugbo alas 2:30 sa kaadlawon kagahapon, Abril 27, 2025.
Giila ang biktima nga si Police Corporal Ridrid Ordiñeza Castañeda, 35-anyos nga residente sa Upper Pakigne Spring Village sa Minglanilla, Cebu. Siya nadestino sa Sawang Calero Police Station sa Cebu City Police Office (CCPO).
Base sa inisyal nga imbestigasyon, si Castañeda nagmaneho sa iyang motorsiklo pauli sa ilang balay human niapil sa Simultaneous Anti-Criminality Law Enforcement Operation (SACLEO) nga gipatuman sa ilang police station niadtong Sabado sa gabii.
Sa pag-abot sa nahisgutang lugar,nawad-an og kontrol ang biktima sa iyang motorsiklo sanglit dangog ang dalan tungod sa ulan. Ang iyang motorsiklo nabangga dayon sa punoan sa daplin sa dalan.
Sa imbestigasyon sa kapulisan, si Castañeda nalagpot gikan sa iyang motorsiklo ug atangtang usab ang iyang helmet sa iyang ulo.
Dali kini nga gidala sa Cebu City Medical Center (CCMC), sakay sa ambulansya sa Brgy. Kamputhaw, apan namatay na kini una naabot sa tambalanan.
Subay niini, agig pagbangotan sa pagtaliwan sa maong polis ang Sawang Calero Police Station sa Cebu City Police Office (CCPO), nag-half-mast karon sa ilahang bandela.(BOMBO IRENE ARDIENTE)
