Mipagawas ang Vietnam og protesta batok sa mga pamahayag sa China ug Pilipinas kalabot sa Sandy Cay, usa ka gilalisan nga bahin sa Spratly Islands sa West Philippine Sea (WPS) nga gikonsiderar sa Vietnam nga bahin sa ilang teritoryo.
Matod ni Pham Thu Hang, ang tigpamaba sa foreign ministry sa Vietnam, nagsumite sila og mga protest notes sa duha ka nasud isip tubag sa giingong paglapas sa ilang soberanya.
Giinsister sa Vietnam nga ang Spratly Islands kabahin sa ilang teritoryo ug nanawagan sa mga nasud nga nalambigit nga respetuhon ang mga katungod niini ug likayan ang paghimo og mga lakang nga makapasamot pa sa tensiyon.
Ang protesta nagsunod sa pagbinayloay sa mga insulto tali sa China ug Pilipinas sa miaging semana, human ang Chinese state media nagtaho nga ang ilang coast guard nagbutang sa Tiexian Reef, bahin sa Sandy Cay, ubos sa ‘maritime control’ niadtong tunga-tunga sa Abril.
Agi’g tubag, gipagawas sa Philippine Coast Guard ang hulagway nga nagpakita sa mga sundalong Pilipino nga nagpataas sa bandila sa nasod sa samang lugar, usa ka adlaw sa wala pa ang giingong pagtanom sa bandila sa China sa Sandy Cay.
Nagpabiling taas ang tensyon sa rehiyon, diin ang pipila ka mga nasud sama sa Vietnam, Pilipinas, ug Malaysia nag-angkon usab sa mga bahin sa dagat nga halos giangkon sa China, bisan pa sa internasyonal nga hukmanan nga nagdesisyon nga ang pag-angkon sa Beijing sa WPS walay legal nga basehan.
