PROVINCE OF CEBU- Gipasakaan og kasong graft sa Office of the Ombudsman Visayas ang mga dagkong opisyal sa lungsod sa Dalaguete tungod sa ilegal nga pagtukod og bodega sa yuta nga wala mapalit ug gipanag-iya sa lokal nga kagamhanan.
Ang mga reklamante girepresentahan ni Jose Rene Moran ug Braulio Moran, ug ang yuta gipanag-iya sa mga manununod ni Maria Zambrano.
Samtang, ang mga akusado mao sila si Bise Mayor William Lagahid; ug SB Members Ernesto Tangpos, Kevin Belandres, Felix Villacorta, Royce Nikko Cesante, Hilario Belciña; ABC President Elmer Licaros; ug SK President Danilo Sombilon Jr.
Lakip sa mga kasong gipasaka batok nila mao ang paglapas sa Republic Act No. 3019 o ang Anti-Graft and Corrupt Practices Act, gross negligence, serious misconduct, ug serious dishonesty.
Si Joey Borinaga, legal counsel sa mga reklamante, niingon nga nitumaw ang reklamo human ang kagamhanan sa lungsod nagtukod og bodega sa gibana-banang 4,000 metro kwadrado nga lote nga gipanag-iya sa mga reklamante sa Brgy. Tapon, Dalaguete.
Ang mga reklamante nipasangil nga ang kagamhanan sa lungsod wala makig-coordinate o nagpahibalo kanila bahin sa pagpatuman sa nasangpit nga proyekto.
Human mahibaw-i niini, misuwat dayon ang mga reklamante ngadto sa Sangguniang Bayan nga nagpahayag nga wala silay tuyo nga ibaligya ang ilang lote, samtang niadtong Abril 28, 2025, giaprobahan sa konseho ang pagpagawas sa pundo. Hinuon, ang ordinansa wala maghisgot sa kantidad nga ipagawas alang sa parcel sa parsela sa lote.| Bombo Nathaniel Sandoval
