Andam ang Czech Republic sa pag-abli sa mga pultahan niini ngadto sa kapin sa 10,000 ka hanas nga langyaw nga mga trabahante, uban sa Pilipinas nga nakita nga usa ka mahinungdanong kauban sa pagpuno niining nagkadako nga panginahanglan sa mamumuo, ilabi na sa transportasyon, logistik, ug teknikal nga mga sektor.
Subay sa kalihokan sa Philippine-Czech Republic Friendship Week, diin, gipasiugdahan kini sa Department of Migrant Workers (DMW), gibutyag sa Czech Ambassador Karel Hejč nga ang ilang gobyerno nibutang og tinuig nga quota nga kapin sa 10,000 ka work visa alang sa mga Filipino.
Subay niana, sa pagkakaron, kapin sa 11,000 ka mga trabahanteng Pilipino ang nagtrabaho ug nagpuyo sa tibuok Czech Republic.
Sumala pa, ang kusog nga panginahanglan alang sa mga langyaw nga hanas nga mga trabahante naggikan sa kadaghanan sa nag-uswag nga sektor sa transportasyon ug logistik sa Czech Republic.
Dugang niana, ang Ministry of Transport adunay partikular nga panginahanglan alang sa mga drayber, mga operator sa publiko nga transportasyon, ug mga trabahante alang sa mga dagkong sentro sa pag-apod-apod sa Central ug Eastern Europe.
Sa laing bahin, si DMW Secretary Hans Leo Cacdac, niingon nga ang mga trabahanteng Pilipino gitamod pag-ayo tungod sa ilang propesyonalismo, pagkamapasibo, ug bansay nga pamatasan sa pagtrabaho.
Gikutlo ug gitataw usab niya ang joint communique nga gipirmahan ni Presidente Ferdinand Marcos Jr., ug Czech Republic President Petr Pavel niadtong 2024, diin naggarantiya kini sa patas nga pagtagad sa mga overseas Filipino workers (OFWs) ubos sa labor laws sa langyaw nga nasud.(Bombo Irene Ardiente)
