Nakurat si kanhi Overseas Workers Welfare Administration (OWWA) administrator Arnell Ignacio sa pagpasaka og kaso batok kaniya tungod sa pagpalit sa ahensya og P1.4 bilyones nga kantidad sa luna.
Matod niya nga ang maong plano sa pagpalit og yuta nabutyag niadto pang 2018 samtang deputy administrator pa lang siya.
Kauban niya ang pipila ka opisyal sa OWWA sa pagdungog sa Senado bahin sa maong butang.
Gitataw niya nga walay iregularidad sa nahisgutang kontrata tungod kay ila pa kining gikuwestiyon sa Department of Budget and Management (DBM) samtang ang yuta nga paliton sa Ninoy Aquino International Airport (NAIA) terminal 1 gibalor mismo sa LandBank diin mikuha usab sila og permit sa Civil Aviation Authority of the Philippines (CAAP).
Ang nasangpit nga yuta gamiton unta sa mga short-term rest area sa mga namalik nga overseas Filipino workers (OFWs) gikan sa gawas sa nasod.
