CEBU CITY—Nagtagbo si outgoing Cebu City Mayor Raymond Alvin Garcia ug incoming Mayor Nestor Archival sa Cebu City Hall uban sa ilang tagsa-tagsa ka mga kawani, alang sa opisyal nga transisyon sa ilang mga administrasyon, karung adlawa Lunes, Mayo 26,2025.
Ang transition meeting gipasiugdahan sa mga representante gikan sa Department of the Interior and Local Government–Cebu City.
Lakip sa mitambong sa transition team ni Archrival mao sila si Konsehal Joy Augustus Young ug Engr. Nigel Paul Villarete.
Gipaila-ila ni Archival ang mga sakop sa iyang transition team, samtang si Garcia nipadayag sa iyang hingpit nga suporta sa umaabot nga mayor.
Gitugotan usab ni Garcia si Archival sa paggamit sa Mayor’s Conference Hall sugod Martes, Mayo 27, 2025, aron mapadali ang sunodsunod nga transition meetings.
Sa pakighinabi sa tigbalita kang Garcia, gitino niini nga iyahang gusto ang ‘smooth transition’ aron makahimo dayon si Archival sa iyahang mga buluhaton isip bag-ong Mayor sa Dakbayan sa Sugbo.
Samtang gikalipay ni Mayor Nestor Archival ang pahayag ni Garcia nga andam mutabang kaniya aron sa ikalambo sa Dakbayan sa Sugbo.
Gidugang niini, nga sa pagkakaron, ang mga kawani sa Cebu City Hall gikatakdang mopailawom sa evaluation aron masiguro nga sila labing kuwalipikado ug angayan nga magpadayon sa ilang serbisyo ubos sa administrasyon niini.
Giklaro ni Archival nga ipaubos sa evaluation ang mga empleyado sa City Hall, nunot sa hangyo ni outgoing Mayor Raymond Alvin Garcia nga magpabilin ang mga empleyado ubos sa bag-ong liderato.
