Magpakatap ang Philippine National Police (PNP) og 37,000 ka pulis, aron masiguro ang seguridad nunot sa pag-abli sa klase sa tibuok nasod karong umaabot Hunyo 16, 2025.
Gikabutyag ni PNP spokesperson Brig. Gen. Jean Fajardo, nga ang mga uniformed personnel mopakusog sa beat patrols ug police visibility sa mga lugar ug mga dalan paingon ug gikan sa mga eskwelahan.
Dugang usab niya nga ang police assistance desks ipahimutang uban sa mga mobile ug foot patrollers, aron sa pagsiguro ug pagtabang sa mga estudyante, ginikanan ug mga kawani sa eskwelahan.
Ang pag-abli sa klase magsilbi usab nga pagsulay sa paspas nga pagresponde sa kapulisan nga gihimo ni PNP Chief Gen. Nicolas Torre.
Kahinomdoman nga gi-tuyo ni Torre nga isira ang tanang police boxes ug police community precincts aron mapadako ang visibility sa mga karsada ug ubang bahin sa komunidad.
Gitoohan nga tumong usab sa iyang palisiya sa pagpakusog sa mga paningkamot sa pagdakop sa mga kriminal ug sa pagwagtang sa mga hulga sa komunidad.
Si Torre niingon nga ang iyang hagit subay usab sa direktiba ni Presidente Ferdinand R. Marcos Jr. nga lapas pa sa pagpalambo sa statistics sa krimen ug pagtutok sa paghimo sa mga tawo nga tinuod nga mobati nga luwas. | via Bombo Irene Ardiente
