Gipadayag ni ICC-accredited lawyer Atty. Joel Ruiz Butuyan nga mamahimo lang nga temporaryong makagawas si kanhi Presidente Rodrigo Roa Duterte kung duol siya sa Netherlands diin siya husayon sa International Criminal Court (ICC) sa The Hague.
Ang maong pamahayag nunot sa hangyo sa kampo ni Duterte nga temporaryong buhian siya ngadto sa wala hinganli nga nasod nga gikatahong misugot nga mo-host niya.
Matud ni Butuyan nga ang nasud nga makadawat lang kang Duterte kinahanglang sakop sa ICC aron makatuman sa mga lagda sa korte.
Kahinumduman nga gikompirmar sa prosekusyon nga wala silay supak sa hangyo sa kampo sa kanhi Presidente basta adunay mga kondisyon, lakip na niini ang pagdili kang Duterte sa paggamit sa internet o cellphone ug ang pagtugot lamang sa mga sakop sa pamilya nga makig-estorya kaniya.
Wala nabalaka ang abogado sa ICC sa kahadlok sa posibleng pagbuhi ni Duterte, nga matod niya makahatag og kahadlok sa mga biktima sa extrajudicial killings ubos sa iyang kampanya sa ‘war on drugs’, ug mahimo usab nga makaapekto sa integridad sa International Court.
Gihimakak usab niya ang mga balita nga mikaylap bahin sa senador nga mahimong ibalik si Duterte sa Pilipinas, nga gitawag kini nga “fake news.”
Dugang niini, dili politiko ang giatubang nga kaso sa kanhi presidente, kon dili tungod sa grabeng krimen batok sa katawhan.
