Nasagmuyo si Vice Presidente Sara Duterte sa kakuwang sa aksyon sa gobyerno sa pagpabakwit sa mga Pilipino nga natanggong sa panagbangi tali sa Iran ug Israel.
Matud sa ikaduhang presidente nga sa dihang una palang nga mipagawas og missiles kay kinahanglan aduna nay plano ang gobyerno ug dili paaboton nga masirado na ang mga utlanan ug kanselado na ang mga tugpahanan, diha pa sila mohimo og lakang.
Hilabi na nga gihimug-atan ni Sara nga nipasidaan na una ang duha ka nasud nga adunay gubat nga mahitabo ug dili na kini nakapakurat sa tibuok kalibutan.
Ingon man ang pagtaas usab sa presyo sa lana kay dili usab angay ikangangha tungod kay kanunay kini nga mahitabo sa matag higayon nga aadunay kasungian nga motumaw sa Middle East.
Sa pikas bahin, gisaway usab sa Vice Presidente ang kasamtangang administrasyon ug giinsister nga personal nga kwarta niini ang iyang gigamit sa pagbiyahe sa Australia.
Subling pagpasabot niini nga ang personal nga pagbiyahe kay walay gigamit nga kwarta sa gobyerno apan padayon gihapon sa pagtrabaho.
Hinungdan nga wala kini makasabot sa gustong ipaabot sa administrasyon ngadto sa iyaha, busa nakabuhi kini og mga pulong nga bugo ang administrasyon.
