DANAO CITY,CEBU- Patay ang usa ka pulis human gipusil sa usa ka wala pa nailhing lalaki nga miilog og pistola ngadtu sa usa ka Security Guard, sa dalan P. Del Pilar sa Barangay Poblacion sa dakbayan sa Danao, kagahapon, Hunyo 27, 2025.
Gila ang biktimang pulis nga si Patrolman Mark Gomer Ornopia Sr., sakop sa Danao City Police Station, diin pipila ka oras human sa insidente, gideklarar nga patay.
Sa pakighinabi sa Bombo Radyo Cebu team kang Plt.Col. Henrix Bancoleta, ang Hepe sa Danao City Police Station, iyang giasoy nga nahitabo ang insidente alas 12:20 sa udto, diin, adunay gikataho nga usa ka lalaki nag bitbit ug pistola nga .38 revolver nga adunay tulo ka mga buhing bala.
Busa, dali kining gi-respondehan ni Ornopia ug usa ka BJMP Personnel nga anaa sa duol sa maong area samtang aduna silay gilakaw sa korte.
Gigukod ang maong suspek sa duha ka mga awtoridad gamit ang motorsiklo, sa pag-naog sa pulis dali kining nikupot sa luyo sa suspek ug kalit ni-pusil ang maong suspek sa pulis na naigo ang bahin sa nawong niini, hinungdan sa iyang kamatayon.
Nisuway pa og ikyas ang maong suspek, apan gipusil kini sa kauban nga BJMP personnel ug patay usab kini, diha-diha dayun.
Sa pikas bahin, nahinabi usab sa Bombo Radyo Cebu ang Security Guard nga si Alberto Lacio, diin iyahang gisaysay nga gigunitan siya sa lalaki samtang nagpalit kini og softdrinks sa tindahan duol sa iyang gitrabahoan nga pawnshop ug kalit nga gikuha ang iyang .38 revolver nga diha sa iyang kild nga walay locker set.
Dugang pa ni Lacio nga gitiunan siya sa armas sa lalaki ug gibira ang gatilyo sa pistola apan swerte siya nga wala kini mobuto.
Gisuwayan pagdasmag sa guwardiya ang suspek apan midagan kini dala ang pistola.
Sa pagkakaron, padayon pa nga giimbestigahan sa kapulisan ang pagkatawo sa suspek, ug aduna na silay ID aron ma-verify kini.
Kusganon usab nga gikondenar sa Police Regional Office 7 ang brutal nga armadong komprontasyon nga mikalas sa kinabuhi sa usa ka dedikadong pulis nga miresponde sa insidente.
