Nimando sa daling pag-release sa P80-milyones nga emergency funds gikan sa panudlanan sa Kagamhanang Lalawigan sa Sugbo si Cebu Provincial Governor Pamela “Pam” Baricuatro” human nakigtagbo sa mga kadagkuan sa tanang gidumala sa Kapitolyo nga mga ospital sa tibuok probinsya.
Kini ang gipahibalo sa gobernadora atol sa pakigtagbo sa mga sakop sa tigbalita niadtong Huwebes, Hulyo 3 sa Cebu Capitol aron maremedyohan dayon sa daling panahon ang sugyot sa mga tambalanan sa dugang nilang gipanginahanglan.
Gamiton kini sa pagpalit og mga tambal, mga gamit sa medisina, ug uban pang gikinahanglan sa mga tambalalan aron mapuno niini ang kapasidad nga gitumong sa pagserbisyo sa mga Sugbuanon.
Gani sumala pa ni Provicial Administrator Ace Durano nga sa 16 ka mga tambalanan nga gidumala sa Kapitolyo kay 10 niini ang anaa ra sa infirmary level nga nagpasabot nga mga gagmayng kakuliang panglawas ra ang maserbisyohan.
Gitataw nila ubos sa bag-ong pamunuan ni Gov. Baricuatro nga magpasaka ang lebel sa kahanas sa mga infirmary level hospital ngadto na sa level 1 aron makaserbisyo og mga minor surgeries ingon man ang mga level 1 ug 2 kay ipasaka ang kahanas aron dili na magpunsisok sa Vicente Sotto Memorial Medical Center ang nanginahanglan og specialized medical procedure.
Kahinumduman nga sa wala pa makabalik sa gahum si kanhi Gobernadora Gwendolyn Garcia sa Kapitolyo niadtong 2019, kay nahimong baskog ang mga provincial ug district hospitals sa Sugbo ubos sa administrasyon ni Hilario “Junjun” Davide III ug Agnes Magpale sa ilang “Kalambuan sa Kahimsug sa Panglawas alang sa Kalambuan sa Matag Sugbuanon” program apan gitangtang kini human Nawala sila sa pwesto sa pagka-gobernador sa Sugbo.
