Nanawagan si Pope Leo XIV sa mga obispo nga Pilipino nga magmalig-on sa pagpasiugda sa kalinaw ug pagpanalipod sa dignidad sa matag tawo, sa pag-abli sa ika-130 nga plenary assembly sa CBCP sa Bohol.
Sa iyang unang mensahe ngadto sa Catholic Bishops’ Conference of the Philippines sukad sa iyang pagka Santo Papa niadtong Mayo, si Pope Leo mipadayag og mainitong pagtimbaya ug pag-ampo alang sa malampusong asembliya sa mga obispo.
Diin iyang gidasig sa pagpahimulos sa Jubilee Year isip kahigayonan sa pagpabuhi sa gugma ug paglaom sa Diyos ngadto kang Kristo.
Gibasa ang mensahe ni Apostolic Nuncio Archbishop Charles Brown niadtong Sabado, ang unang adlaw sa tulo ka adlaw nga panagtapok sa kapin 80 ka mga obispo sa Anda, Bohol.
Lakip usab sa maong tigom ang mga piniliay diin si Arsobispo Gilbert Garcera sa Lipa napili isip bag-ong presidente sa CBCP, ug si Archbishop Julius Tonel sa Zamboanga isip bise presidente.
Ang duha maoy mohulip kang Cardinal Pablo Virgilio David sa Kalookan ug Bishop Mylo Hubert Vergara sa Pasig, kinsa susama nga motapos sa ilang ikaduha ug kataposang termino isip presidente ug bise presidente karong umaabot Nobyembre.
Sa homily ni Archbishop Brown atol sa Eukaristikanhon nga Kasaulogan sa St. Michael the Archangel Parish, Jagna, Bohol, gitumbok niini nga ang pagaom gipunting sa umaabot.
Ingon man nga ang mga Kristohanon maoy mga tawo sa paglaom ug kalipay, apan wala kini magpasabot nga atong ibaliwala ang nangagi o kalimtan ang mga nangagi.
