SOUTH BUTON, INDONESIA- Napalgan sulod sa tiyan sa otso metros nga gitas-on nga sawa, ang lawas sa usa ka 63-anyos nga mag-uuma, kinsa gikatahong missing gikan sa Batauga Subdistrict, South Buton District, Southeast Sulawesi, Indonesia, niadtong Sabado sa alas 2:30 sa hapon. lokal nga oras, Hulyo 5, 2025.
Ang mag-uuma nga giila lang sa pangalan nga LN, taga Majapahit Village sa Batauga Subdistrict, South Buton (Southeast Sulawesi), nawala niadtong Biyernes sa buntag samtang nagtrabaho sa iyang uma.
Ang iyang motorsiklo nakit-an nga giparking sa duol, hinungdan sa pagpangita sa komunidad.
Niadtong Sabado, mga alas 2:30 sa hapon, lokal nga oras, nakit-an sa mga tagabaryo ang usa ka talagsaon nga niburot nga 8 metros nga sawa sa lugar.
Nagduda sila nga nakatulon kini og dili kasagaran nga gidak-on, mao nga ilang gipatay ang bitin, ug gi-ablihan kini, diin ilang nakit-an ang lawas ni LN sa sulod, usa ka subo ug talagsaon nga panghitabo sa rehiyon.
Si Laode Risawal, head of emergency and logistics sa South Buton disaster management agency, nikompirmar nga mao kini ang unang natala nga kaso sa distrito sa usa ka residente nga gilamoy sa sawa.
Apan, nidaghan ang mga nakakita sa dagkong mga sawa sa milabay nga mga bulan, ilabina sa panahon sa ting-ulan, tungod kay ang mga sawa mosulod aron mangayam og kahayupan.
Ang mga reticulated python (Malayopython reticulatus) lumad sa Southeast Asia ug nailhan nga labing taas nga mga bitin sa kalibutan.
Bisan tuod talagsaon, ang mga pag-atake sa mga tawo natala, ang Indonesia adunay kasaysayan sa mga trahedya nga mga insidente nga sama niini: pananglitan, sa tunga-tunga sa 2024, duha ka hamtong nga mga babaye ang nakit-an sulod sa mga sawa sa South Sulawesi.
Ang susamang kaso unang gitaho niadtong 2017 sa West Sulawesi, diin ang biktima usa ka hamtong nga lalaki.
