Gi-awhag ni Senador Kiko Pangilinan ang National Food Authority (NFA) ug local government units (LGUs) nga mopalit og suplay sa bugas ug uban pang produkto ga nakadirekta gikan sa mga mag-uuma sa patas ug makatarunganon nga presyo sa merkado.
Ang apela ni Pangilinan nunot sa mga taho nga ang palay gipalit na lang sa ₱13 matag kilo sa pipila ka lugar sa nasud, busa, gisugyot niini nga mopalit ang NFA og humay direkta gikan sa mga mag-uuma sa dinagkong sukod aron malikayan ang dugang nga pagka-alkanse.
Sa laing bahin, giawhag usab niya ang mga LGU’s nga ipatuman ang RA 11321 o ang “Sagip Saka” Law, nga nagtugot kanila sa pagpalit og direkta gikan sa mga mag-uuma ug mangingisda nga walay public bidding.
Ang magbabalaod nagtumong nga kung dili pa andam ang NFA, kinahanglang molihok ang mga lokal nga kagamhanan, kay matod niya, ang “Sagip Saka” magamit sa pagpalit og bugas, humay, utanon ug uban pang produkto sa patas nga presyo.
Gipasabot pa ni Pangilinan nga ang “Sagip Saka” Law mahimong gamiton sa pagpalit ug pagkaon alang sa school feeding programs, food packs, relief goods, ug uban pang panginahanglanon sa gobyerno—samtang nagsiguro nga ang mga mag-uuma makakuha og desente nga panginabuhi.
Gipasidan-an usab sa senador nga kung dili molihok ang gobyerno, mahimo’g daghang mga mag-uuma ang mohunong sa pagpananom — nga mahimong hulga sa suplay sa pagkaon sa nasud.|Bombo Irene Ardiente
