LAPU-LAPU CITY,CEBU- Mimando si Lapu-Lapu City Mayor Cindi King-CHan nga paimbestigaran ang mikatap nga video online nga nagpakita sa usa ka 12-anyos nga batang lalaki nga gilumsan sa iyang kaugalingong apohan sa Sitio Balangkoy sa Barangay Gun-ob sa susamang dakbayan.
Kini ang nahimong aksyon sa kagamhanang dakbayan pinaagi sa pagluwat niini og statement sa Lapu-Lapu City Information Office Facebook Page niadtong Miyerkules, Hulyo 9 diin gimandoan ni Mayor Chan ang City Social Welfare and Development Office (CSWDO) uban sa Barangay Violence Against Women and Children (VAWC) desk aron sa pagpa-imbestigar sa maong panghitabo.
Gani ang mga awtoridad nga ila nang gi-assess ang kondisyon ug kahimtang sa bata ug sa iyang apohan.
Gihimug-atan sa Mayor nga importanteng ipatigbabaw ang baruganan sa pagprotektar sa mga kabatan-onan diin ilang kaluwasan ang numero unong priyoridad.
Gipasalig niini sa publiko nga ang lokal nga panggamhanan sa dakbayan sa Lapu-Lapu kay mibuhat na sa mga tikang sa pagsiguro nga makadawat og tukmang psychosocial ug medical support ang biktimang bata.
