Nanawagan si Senador Christopher “Bong” Go sa publiko nga mag-ampo alang sa kahimsog ni kanhi Presidente Rodrigo Duterte, ug suportahan ang resolusyon sa Senado nga nanawagan sa iyang dinaliang pagpauli gikan sa The Hague.
Sa usa ka emosyonal nga pakighinabi, gipaambit ni Go ang istorya sa kamanghuran nga anak nga babaye ni Duterte, si Kitty Duterte, bahin sa nagkagrabe nga kahimtang sa kanhi presidente.
Matod niini, niwang na kaayo ang presidente ug panit ug bukog nalang.
Gitataw ni Go nga dili angayan nga matiguwang si Duterte sa langyaw nga nasud.
Dugang pa niini nga wala nay access si Duterte sa iyang mga doktor sa Pilipinas, hinungdan nga grabe ang iyang kabalaka ug kaguol gumikan gawas sa tiguwang na kini kay daghang sakit nasab ang iyang gipamati.
Gikompirmar usab ni Go nga co-author siya sa resolusyon nga gisang-at sa Senado uban nila ni Senador Ronald “Bato” dela Rosa ug Senador Robin Padilla, nga nanawagan sa hinanaling pagpauli ni Duterte gikan sa prisohan sa The Hague.
