Magpadayon sa paghagit sa mga ilegal ug mapugsanon nga aksyon sa maritime domain sa nasud ang gobyerno sa Pilipinas.
Kini maoy gipasiugda sa National Maritime Council (NMC) sa usa ka pamahayag nga giluwatan dungan sa pagsaulog sa ikasiyam nga anibersaryo sa 2016 arbitral award nga nadaog sa PH sa The Hague, Netherlands.
Sumala pa niini nga ang Award kay binding, final, ug dili mapapas ug gawas na sa pamolitika kay ubos na kini sa undeniable part of the body sa international law.
Asoy pa nga ang arbitral award magpabilin usab nga usa ka giya alang sa gagmay ug dagkong mga nasud nga ang pagmando sa balaod kinahanglan nga tahuron ug nga ang pagpamugos, agresyon, ug supak sa balaod nga pagpalapad walay dapit sa moderno ug sibilisadong kalibutan.
Dugang pa nga ang Pilipinas magpadayon usab sa pagpasiugda sa diplomasya ug konsultasyon samtang gipanalipdan ang nasudnong soberanya ug maritime integrity sa nasud.
Nag-apelar usab kini sa tanang Pilipino nga ipadayon ang rally alang sa 2016 Arbitral Award samtang gipanalipdan ang soberanya, sovereign rights ug hurisdiksyon sa atong mga maritime zone, partikular sa West Philippine Sea.
