Gianunsyo sa pipila ka bahin sa Sugbo ang suspensyon sa klase sa ilang mga pampublikong tunghaan nunot na sa gipanglantawan kusog nga uwan nga mubundak karong adlaw sa Biyernes, Hulyo 18, 2025.
Ang mga lugar nga nideklarar sa suspensyon kay mao ang dakbayan sa Sugbo, Mandaue, Talisay, Naga, Lapu-Lapu, Minglanilla, ug San Fernando.
Sa dakbayan sa Sugbo, gi-anunsyo ni Cebu City Mayor Nestor Archival Sr. pinaagi sa iyang social media account nga wala gihapo’y klase sa tanang pampublikong tungahan sa dakbayan sa Sugbo tungod sa gipanglantawan kusog nga bunok sa uwan.
Samtang sa dakbayan sa Talisay, si Mayor Gerald Anthony “Samsam” Gullas ang mibuhat sa maong anunsyo subay sa ilang konsultasyon sa DepEd Talisay Schools Division nga suspensohon ang klase sa ilang lugar.
Gipahibalo niini nga niadtong Huwebes sa gabii, Hulyo 17 diin nanukad ang kasayuran sa pagsuspenso sa klase karong adlawa tungod sa forecast nga giisyu sa Philippine Atmospheric, Gephysical and Astronomical Services Administration (PAGASA) nga adunay halapad nga kasarangan ngadto na sa kusog nga bundak sa uwan sulod sa 24 oras.
Kasayran nga ang nagpasulabing weather pattern diri karon sa Central Visayas partikular na sa Sugbo kay mao ang Hanging Habagat (Southwest Monsoon) nga gipabaskog tungod sa hinungaw (trough) sa bagyong “CRISING” nga anaa karong sa Eastern seaboard sa Northern Luzon.
