Kapin sa 600,000 ka pamilya ang gilauman nga makabenepisyo sa usa ka buwan nga moratorium sa binuwan nga housing loan amortization sumala pa sa Department of Human Settlements and Urban Development (DHSUD).
Kabahin kini sa programa sa gobyerno aron mapagaan ang ilang palas-anon taliwa sa dili maayong epekto sa sunod-sunod nga kalamidad nga miigo sa nasod sa miaging mga adlaw.
Matod pa ni DHSUD Secretary Jose Ramon Aliling nga 500,000 ka mga panimalay gikan sa National Housing Authority (NHA) ang makabenepisyo sa usa ka buwan nga moratorium nga gipatuman karong Agosto samtang 34,622 ka mga pamilya ang hatagan usab og usa ka buwan nga moratorium sa pagbayad ubos sa National Home Mortgage Finance Corporation (NHMFC).
Matod niya kapin sa 148,000 ka mga pamilya kansang mga panimalay ug panginabuhian ang grabeng naapektuhan sa milabayng mga bagyo ug ang kusog nga habagat ang makabenepisyo sa moratorium gikan sa Social Housing Finance Corporation (SHFC).
Apan ang opisyal nagkanayon nga ang usa ka buwan nga moratorium sa Home Development Mutual Fund o Pag-IBIG Fund dili automatic nga mahatagan og option ang mga miyembro nga dili gustong mo-avail.
Kadtong mo-avail, matod niya, kinahanglang mo-apply sa Pag-IBIG branches.
Gawas sa mga moratorium sa pagbayad, ang DHSUD nangandam sa paghatod sa post disaster assistance pinaagi sa ilang Integrated Disaster Shelter Assistance Program (IDSAP) sa hugot nga koordinasyon sa mga local government units.
