Gipasalig ni Presidente Ferdinand Marcos Jr. nga manubag ang iyang gobyerno sa gikatahong hinay nga suplay sa tubig sa nasud.
Sa iyang ikaupat nga State of the Nation Address (SONA), siya niingon nga buhaton sa Local Water Utilities Administration (LWUA) ang tanan aron mahibalik ang serbisyo sa tubig sa nasod.
Gihatagan niini og gibug-aton nga ang mga nagpabaya ug napakyas sa hinungdanon nga serbisyong publiko kinahanglan nga manubag.
Bisan og wala hinganli sa presidente ang bisan unsang kompanya, ang LWUA niingon nga ilang gisusi ang reklamo bahin sa serbisyo sa Primewater Infrastructure Corp, nga gipanag-iya sa pamilyang Villar, nga naghupot sa 74 ka water districts sa mga lalawigan sa Cavite, Bulacan, Pangasinan, Batangas, Tarlac, Camarines Norte, Subic, ug uban pa.
P20/Kg sa bugas, napamatud-an sa Marcos administrasyon
Samtang, gibutyag usab ni Marcos nga napamatud-an sa iyang administrasyon nga posible ang P20 matag kilo nga bugas nga dili makaalkanse sa mga mag-uuma.
Kini subay sa mga malampuson nga programa nga gilusad sa pipila ka bahin sa nasud pinaagi sa mga Kadiwa stores.
Gidugang sa Presidente nga sa P113 bilyones nga gigahin sa Department of Agriculture, mapalig-on ang programa sa ahensya aron ilusad ang programa sa tibuok nasud.
