Wala gipanglantawang nga maigo sa pagpahamtang sa mas taas nga reciprocal tariff alang sa mga export sa US ang economic output sa Pilipinas karong 2025, nga gitakda sa 19 percent nga epektibo karong Agosto 1.
Naabot ang pagkunhod sa taripa human sa pagbisita sa US ni Presidente Ferdinand “Bongbong” Marcos Jr. niadtong Hulyo 20 ngadto sa 22, gikan sa 20% nga gipahibalo pipila ka semana ang milabay apan mas taas og gamay sa 17 percent nga gipahibalo niadtong Abril.
Sumala ni Finance Undersecretary Domini Velasquez, sa sidelines sa 2025 mid-year economic briefing nga gipasiugdahan sa British Chamber of Commerce of the Philippines (BCCP) sa Makati City niadtong Huwebes kay nakamatikod nga ang mga export sa Pilipinas ngadto sa US kay gamay ra kon itandi sa ubang mga lugar.
Ang mga economic managers kay nagtakda og 5.5 ngadto sa 6.5 percent nga target sa pagtubo alang sa nasud karong tuiga diin sa unang kwarter ang GDP misaka ngadto sa 5.4 percent gikan sa 5.3 percent sa miaging quarter.
Matud pa ni Velasquez nga ilang namatikdan ang padayon nga pagsaka sa mga export nga lagmit gipakusog sa front-loading sa mga negosyo sa US aron mapugngan ang pagbayad og dugang sa higayon nga mabutang na ang bag-ong taripa.
Samtang si Trade Undersecretary Allan Gepty, atol sa samang kalihokan, miingon nga nagpadayon sila sa negosasyon sa ilang mga katugbang sa US sa mga detalye sa pinakabag-o nga taripa, apan miingon nga ang 19 percent mao ang ilang gitaganang ipatuman sugod karong Biyernes.
