PROVINCE OF CEBU- Gitubag ni Acting Provincial Director, Police Colonel Christopher M. Bermudez, ang mga isyu kabahin sa disiplina sa kapulisan ug kaluwasan sa kadalanan sa lalawigan sa Sugbo atol sa pakighimamat sa media niadtong Hulyo 30, 2025.
Kini may kalabotan sa reklamo batok sa usa ka pulis nga giingong nanulis ug nagpabuto sa armas sa lungsod sa Minglanilla, Cebu.
Gisiguro ni Bermudez nga seryosong gitutukan sa Cebu Police Provincial Office (PPO) ang insidente.
Nagpasalig siya nga ipatuman ang due process ug disiplina nga walay pagpanagana ni pabor-pabor.
Matud ni PCOL Bermudez, ang maong insidente dili nagrepresenta sa baruganan ug tinuod nga serbisyo sa Cebu PPO, hinungdan nga sila mohimo og tukmang aksyon aron matubag kini.
Gihisgutan usab sa opisyal ang isyu sa kanunayng disgrasya sa Transcentral Highway — usa sa mga accident-prone areas sa lalawigan.
Gipasiugda niya nga gipakusgan ang police visibility ug gi-intensify ang koordinasyon sa uban pang mga ahensya aron masiguro ang kaluwasan sa mga motorista ug pasahero.
Kini ubos sa Project C.H.R.I.S., usa ka inisyatibo sa Cebu PPO nga nagpaluyo sa transparent, fast, focused, ug fearless policing, nga gitumong sa pagtukod og mas luwas nga komunidad ug pagpabakod sa pagsalig sa publiko sa kapulisan.
