Nahimong trahedya ang biyahe sa usa ka turistang Pinoy sa Hong Kong.
Sa usa ka pamahayag, gikumpirmar sa Department of Foreign Affairs (DFA), basi sa report gikan sa Philippine Consulate General sa HK, ang kamatayon sa usa ka 35-anyos nga Pilipinong turista human makaangkon og samad sa dihang nabangga kini sa taxi sa Tsuen Wan West, Hong Kong niadtong Agosto 5.
Matod sa Consulate General, ang patayng lawas sa Filipino anaa karon sa Kwai Chung Public Mortuary.
Nipadayag og pahasubo ang Consulate General sa namatyan nga pamilya ug nihalad og pag-ampo alang sa eternal rest sa namatay nga Pinoy.
Ingon man nga gitabangan na sa Konsulada ang pamilya nga makaabot sa Hong Kong aron mahikay ang pagpauli sa patayng lawas sa ilang kabanay.
Basi sa inisyal nga taho, nawad-an og brake ang taxi nga miresulta sa pagkabangga sa Pinoy nga turista nga nigawas sa Nina Hotel human ni-check out.
Gitaho usab sa DFA nga kasamtangang anaa na sa kustodiya sa kapolisan ug nakig-alayon sa HK Police Force ang taxi driver samtang nagpadayon ang imbestigasyon sa kaso.
