Nabag-o ang dagan sa kinabuhi sa usa ka homeless ug palahubog nga lalaki sa Brazil, human kini nakadesisyon nga moapil og dagan sa 8km fun run nga gi organisar sa ilahang lokalidad, samtang duna pa kini “hang-over”.
Sumla ni Isaque dos Santos Pinho, wala siya magdahum nga mokatap ang iyang storya sa dihang naka-desisyon siyang moapil sa walo ka kilometrong lumba sa sa ilahang lugar sa Garrafao do Norte, Brazil. Pag-angkon niini, niadagan lamang siya arun mahuwasan sa iyahang kahubog.
Makita sa video nga naka cargo shorts lamang si pinho, naka t-shirt, ug naka tsenilas, apan desidido kining tiwason ang iyahang dagan taman sa finish line, rason nga daghang mga netizens ang nibilib niini.
Taliwala pa man nga nag-una si Pinho sa unang mga minuto sa maong lumba, na-iwit gihapon kini sa katapusan. Apan tungod sa iyahang ka desidido, gihatagan nalang usab kini og complementary medal sa mga organizers.
Daghang natandog sa estorya ni Pinho, rason nga nagbaha kaniya ang mga running shoes ug uban pang kagamitan pang lumba sa dagan. Karon, naka desisyon na kini nga undangon na ang pag hubog-hubog ug pokusan nalang ang training sa mga umaabot nga marathons.
