DUMANJUG,CEBU- Gipatawag ni Dumanjug Mayor Gungun Gica ang duha ka indibidwal nga gitumbok nga “live-in partners” human masayri nga sila gipadakop sa kapulisan tungod sa seryosong reklamo nga giluwat sa Municipal Social Welfare and Development Office (MSWDO).
Sumala sa imbestigasyon, nga gigamit nila sa malaw-ay nga binuhatan ang usa ka 11-anyos nga batang biktima sukad pa sa edad nga 10 anyos.
Dugan pa, nga giingong gigamit ang bata nga magpakita sa video call nga mohimo og malaw-ay nga butang alang sa ilang mga kliyente, kadaghanan mga langyaw o foreigner, bugti sa kantidad nga P30,000 hangtod P50,000 kada video.
Sa pagpatawag sa Mayor, personal nga gisukit-sukit niya ang duha ka suspetsado.
Dinhi, hilabihan ang kapungot sa Mayor dihang giangkon sa babaye nga dugay na siyang nagbuhat og ingon niini ug gigamit niini ang bata tungod kay ang mga kliyente mismo mangita og mga menor de edad.
Dugang pa, nasayran ni Mayor Gica gikan sa MSWDO staff nga mibisita kaniya niadtong Martes, nga sumala sa testimonya sa biktima, aduna pa silay laing nabiktima lakip na ang usa ka 9-anyos nga bata ug ilang kaugalingong anak nga gigamit usab sa maong kalihukan sukad pa sa edad nga 1 anyos hangtod 3 anyos.
Gipasabot sa Mayor nga ang mga bata gipakita sa ilang mga foreign clients pinaagi sa video call, usa ka tin-aw nga porma sa cyber pornography ug child exploitation.
Tungod niini, mipahayag ang Mayor sa katawhan sa Dumanjug, nga dili siya magduha-duha nga ipa-priso bisan kinsa nga mahilambigit sa pagpahimulos sa mga bata, bisan pa og walay mopasaka og kaso.
Gitumbok sa Mayor nga kaila siya sa tanan nga may kalambigitan sa mga krimen sama sa rape, child cyber pornography, child trafficking, ug VAWC.
Ang tanang nareport na sa MSWDO ug PNP, ug bisan katong wala pa, aduna na siyay listahan niini.
Gibutyag sa Mayor nga ang mga tawo nga nalambigit sa ingon nga kalihukan hatagan lang ug deadline hangtod Agosto 28 aron mosurrender sa iyang buhatan.
Ang mga dili mosurrender, pagka Agosto 29, sila na mismo ang mangdakop niini.
Nagpahimangno siya sa tanang lumulupyo nga seryoso ang iyang administrasyon sa pagsilot sa tanang matang sa pagpang-abuso ug pagpahimulos sa kabataan ug kababainhan.
